Cynlluniau Adnoddau Coedwig: beth yw eu pwrpas a sut allwch chi gymryd rhan

Mae’r cynllun adnoddau coedwig yn ddogfen reoli graidd a ddefnyddir ar Ystad Goetir Llywodraeth Cymru. Mae’n amlinellu cynigion ar gyfer rheoli coetir yn y dyfodol yn unol â pholisïau ac arferion cyfredol.

Mae’r cynlluniau hyn yn bellgyrhaeddol, gyda phwyslais cryf ar sicrhau manteision cymdeithasol, economaidd ac amgylcheddol, gan ymgorffori’r dull ecosystem ar gyfer rheoli tir.

Hyd cynlluniau

Caiff y cynlluniau eu cymeradwyo am gyfnod cychwynnol o ddeng mlynedd, gyda’r cyfnod wedi hynny (50+ mlynedd) yn cael ei gymeradwyo’n amlinellol. Mae hyn yn caniatáu adolygu’r ddogfen a’i diwygio os bydd angen.

Mae pob cynllun yn cynnwys gweledigaeth hirdymor ar gyfer y coetir ac yn ffurfio’r fframwaith ar gyfer datblygu rhaglenni gwaith manwl.

Safon Sicrwydd Coetiroedd y DU

Mae Ystad Goetir Llywodraeth Cymru wedi’i hardystio’n annibynnol fel un sy’n cael ei rheoli’n gynaliadwy o dan Safon Sicrwydd Coetiroedd y DU. Mae sicrhau bod pobl yn cael gwybod am y cynigion rheoli sy’n effeithio ar eu coetiroedd lleol yn rhan bwysig o gynnal yr ardystiad hwn.

Sut allwch chi roi adborth i ni

Rydym yn casglu barn amrywiaeth o randdeiliaid gwahanol yn ystod y gwaith o ddatblygu cynllun adnoddau coedwig. Mae hyn yn helpu i ddatblygu’r cynllun a chydbwyso a blaenoriaethu’r amcanion sydd weithiau’n cystadlu â’i gilydd.

Gallwch ddod o hyd i’r holl gynlluniau adnoddau coedwig sy’n cael eu datblygu ar hyn o bryd a rhoi adborth ar y cynlluniau rydym yn ymgynghori arnynt.